N-230 entre el tunel i Vielha

Eth secretari d’Estat de Planificacion e Infraestructures, Víctor Morlán, a garantit aué ath sindic d’Aran, Francés Boya, qu’eth ministèri de Foment emprenerà era mielhora dera carretèra N-230 entre Vielha e eth tunèl, un còp s’acòrde ena Comission Mixta entre er Estat e era Generalitat, segontes a assegurat Boya, dempús dera amassada qu’andús an mantengut en Lleida.

Aguesta actuacion ei frut dera inversion qu’er Estat a de realizar en Catalonha en matèria d’infraestructures, d’acòrd damb eth mandat dera disposicion addicionau tresau der Estatut d’Autonomia de Catalonha. Segontes eth tèxte, aguesta inversion s’a d’equiparar ara participacion relativa deth producte interior brut de Catalonha damb relacion ath der Estat entà un periòde de sèt ans, d’ençà dera aprobacion der Estatut, en 2006.

Francés Boya a assegurat qu’era Generalitat e er Estat pactaràn era metuda en marcha des òbres deth tram Vielha – tunèl, ena pròplèu amassada dera Comission Mixta entre andues administracions, segontes eth compromís ath quau a arribat damb Morlán.

Eth sindic a persutat en qué “era mielhora d’aguest tram ei fòrça urgenta, perque, coma ben sap eth ministèri, era carretèra N-230 ei ua via de comunicacion estrategica entath conjunt deth territòri e presente, entre eth tunèl de Vielha e eth caplòc aranés, un estat fòrça deteriorat damb era consegüenta repercussion entara seguretat des sòns usatgèrs”.

Boya a felicitat ath secretari d’Estat peth sòn compromís entà seguir es òbres de reforma deth conjunt dera N-230 enquia Lleida. Atau madeish, Foment invertirà 5 milions d’èuros entath condicionament deth vielh tunèl coma galeria entàs emergéncies e eth pas de mercaderies dangeroses.