Eth Conselh Generau d’Aran a proposat crear vies herrades enes municipis de Les, Arties e Unha. Eth Govèrn aranés trabalhe entà includir aguesta mesura en plan d’accions de 2011 deth Plan de Desestacionalizacion e Internacionalizacion qu’eth madeish Conselh prebotge amassa damb er organisme estatau Turespaña.
Pòble de Les.En aguesti moments, era comission de seguiment deth convèni avalòre era propòsta que, segontes a explicat eth sindic Francés Boya, “a de servir entà promòir eth torisme actiu pendent er ostiu, ena linha de trabalh que ja venguem de desvolopar damb eth Govèrn centrau”.
Eth projècte, avalorat en 100.000 èuros, sajarie de dinamizar es pòbles ar entorn d’aguesti camins hèti damb estructures de hèr e cables d’acèr que permeten arribar a zònes de dificil accès, en tot seguir er exemple des vies herrades que i a plaçades enes Dolomites, eth parçan mès coneishut entad aguest tipe d’activitat.
Es camins serien equipadi damb tot tipe de materiau, coma claus, grapes, passamans, shènes e pònts, entà ajudar a progressar enes zònes verticaus e mès exposades.
Cau rebrembar qu’eth Conselh Generau a renauit damb eth Govèrn d’Espanha eth Plan de Desestacionalizacion deth torisme aranés, implantat d’ençà der an 2008. De hèt, abantes de finaus de març, a d’èster premanit un estudi d’implantacion de prioritats deth projècte.
Aguest ei eth prumèr convèni qu’eth Conselh signèc de forma dirècta damb eth Govèrn centrau e eth que permet desvolopar, per prumèr còp en conjunt der Estat, ua linha d’actuacion entà promòir eth torisme de montanha. D’aguesta forma, era maxima institucion aranesa contribusís ara diversificacion dera economia e complemente er esquí damb d’autes formes de promocion economica e toristica.
