estudi informatiu deth traçat complèt dera N230

Perdices insistís a Foment ena cession d’ua zòna verda en centre de Vielha entà melhorar er connexion de viaus

Er alcalde de Vielha e Mijaran, Pau Perdices, s’amassèc eth dimarts damb eth Delegat deth Ministèri de Foment de Lleida, Juan Antonio Romero, entà insistir ena cession d’ua zòna verda en centre de Vielha. Era demana de cession de 1.000 mètres quarrats de zòna verda publica corresponenta ath chalet d’”Obras Públicas” plaçat ena Av. Castièro de Vielha se remonte ara hè a ueit ans. En an 2002 damb era modificacion urbanistica corresponenta ad aguesta zòna se cataloguèc eth terren coma zòna verda e viadèrs publics en tot èster proprietat deth Ministèri de Foment.
Entar alcalde era cession ei fonamentau entà poder connectar era recenta urbanizada plaça Mossén Joan Casseny damb era Avenguda Castièro e perméter atau eth pas de passants per aguestes dues zònes qu’actuaument son un cu de sac. Segontes Perdices, damb era cession eth nuclèu guanharie mès espaci verd en centre comerciau dera Vila. Er alcalde tanben vò insistir en compliment de projèctes arturadi coma era ampliacion e melhora dera N-230 des dera Boca Nòrd deth tunèl enquià Vielha, era melhora dera senhalizacion dera trauèssa de Vielha e era melhora e seguretat dera carretèra ath sòn pas pera vila. Se tracte de dus projèctes que dejà se trapen en Madrid entà recéber eth vist-e-platz deth Ministèri. En çò que tanh ath projècte de seguretat dera carretèra ath sòn pas per Vielha, Romero la definic coma urgenta e per tant tramitarà eth sòn estudi entà garantir era seguretat e era solidesa deth transit e des passants. Eth delegat de Foment en Lleida comuniquèc ar alcalde qu’en un plaç de dus mèsi se poderie dispausar der estudi informatiu deth traçat complèt dera N230 enquiara frontèra damb França. Perdices comuniquèc era postura deth consistòri de defensar eth projècte d’ua via segregada per Baricauba en tot auer en compde un corredor tunèl per Horno.
D’aute biais, er alcalde de Vielha e Mijaran sollicitarà pròplèument ua amassada damb eth Director Generau de Carretères, Aureliano López entà insistir en aguesti ahèrs.