S'apròve eth Plan director urbanistic dera Val d’Aran

Era Comission d’Urbanisme apròve eth Plan director urbanistic dera Val d’Aran

Diuendres, 04 Junh de 2010

Era Comission Territoriau d’Urbanisme dera Val d’Aran a aprovat aué eth Plan director urbanistic dera Val d’Aran. Era aprobacion, que s’a prenut de forma provisionau abantes dera sua aprobacion definitiva per part deth conselhèr, a compdat damb era assisténcia deth conselhèr de Politica Territoriau e Òbres Publiques, Joaquim Nadal, que copresidís era Comission damb eth sindic d’Aran, Francés Boya. Andús an estat acompanhadi deth vicesindic 1èr e conselhèr d’Administracion Publica e Finances, Rufino Martínez; eth director generau d’Urbanisme, Pere Solà; e eth director generau d’Actuacions Estrategiques e Politica de Sòl, Joan Llort. Eth sindic a declarat qu’era aprobacion deth Plan director urbanistic “signifique un pas important entath país, perque se dòte d’un esturment inexcusable entara planificacion territoriau”. Totun, a assegurat que “s’auesse agut d’aprovar fòrça ans entà darrèr”. Entà Boya, “eth procès a estat long e fòrça participatiu”. Eth Plan, qu’a estat sosmetut dus viatges a informacion publica, “incorpòre era màger part des allegacions des particulars, ajuntaments e eth Conselh”. Joaquim Nadal a afirmat qu’era inauguracion der aeropòrt dera Seu d’Urgell e era aprobacion d’aguest Plan contien, entath Govèrn dera Generalitat, “un naut valor politic, perque satisfèn es interèssi e es besonhs deth territòri”. Nadal a defenut eth desvolopament de politiques que prebotgen er equilibri territoriau en ensem de Catalonha. Se respècten es drets d’urbanizacion Eth Plan suprimís eth precatalòg patrimoniau, perque procedie ena sua màger part d’inventaris, era finalitat des quaus non ère pas normativa, senon de coneishença, estudi e difusion. Atau, se limite aguest precatalòg as béns declaradi coma BCIN o BCIL, segontes era demana qu’en aguest sens auie plantejat eth Conselh. D’un aute costat, se respècten es drets actuaus en sòls urbanizables des entorns des glèises, que se considèren elements de proteccion patrimoniau pera sua centralitat e era sua identificacion damb era imatge des pòbles d’Aran. A requeriment tanben deth Govèrn aranés, se retire era normativa d’edificacion deth Naut Pirenèu, en tot consolidar era normativa qu’Aran dispòse d’ençà des ans 80, fòrça mès precisa e concrèta. Eth Plan includís era possibilitat de plaçar un altipòrt ena zòna deth Plan de Beret, segontes era propòsta deth Conselh. Atau madeish, s’indique qu’eth Conselh Generau redactarà un Plan especiau urbanistic damb er objectiu de potenciar es activitats esportives, ludiques e toristiques e d’establir es usatges que se permeteràn laguens deth Parc territoriau der arriu Garona. Se fomenten es infraestructures Eth Plan descarte, fin finau, era possibilitat de bastir andues variantes dera C – 28 en Salardú e Arties, Se reflectís es alternatives de nau traçat dera N – 230 que plantege eth Ministèri de Foment, en èster aguest era administracion competenta. Se prevé eth tunèl dera Bonaigua coma prioritat estrategica a miei tèrme. Eth document incorpòre era allegacion deth Conselh entà abilitar, ena boca nòrd deth tunèl de Vielha, un pòl d’equipaments e servicis de Foment e, de forma diferenciada, un centre de servicis relacionat damb es usi de transferéncia de residus e parc logistic dera maxima institucion aranesa. D’un aute biais, eth Plan contemple eth besonh d’iniciar un catalòg des bòrdes istoriques dera Val d’Aran, en tot fomentar-ne es sòns usatges toristics, mieiambientaus e de recuperacion deth patrimòni. Entad açò, eth Conselh e es ajuntaments auràn d’elaborar es plans especiaus que desvoloparàn era normativa corresponenta. Mès acòrds Era Comission urbanistica a dat lum vèrda ath bastiment de dus lacs artificiaus entà produsir nhèu ena estacion d’esquí de Baquèira – Beret, e d’un pònt sus er arriu Malo tath transit d’esquiaires. Tanben a aprovat plaçar ua estacion de telefonia mobila que darà servici a Escunhau, Casarilh e Betren, e modificar es Normes Subsidiàries entà projectar un airau residenciau de 3,5 ectarèes ena entrada sud de Bossòst. Era Comission a derivat ar Ajuntament de Vielha – Mijaran era legalizacion d’ua nau agropecuària en Montcorbau, perque ei de competéncia municipau.