redubertura de La Tuca

28.12.09

Era Comission d’Ubanisme dera Val d’Aran vò dar eth vist-e-platz ath projècte de redubertura de La Tuca

Vielha.- Era Comission d’Urbanisme dera Val d’Aran dèc ager lum verda ara modificacion des Normes Subsidiàries e Complementàries deth Planejament dera Val d’Aran en sector deth “pè de pistes” de Tuca, a on i a prevista era recalificacion de 80.000 mètres quarrats repartidi en 560 viuendes, des quaus 130 seràn de proteccion oficiau. Segontes er alcalde de Vielha e Mijaran, Pau Perdices, ei un pas fòrça important entath municipi tot e qu’era aprobacion d’ager ei ua gestion sonque urbanistica qu’a d’anar ligada ath Plan Especiau de desvolopament dera futura estacion d’esquí, e per tant non se tracte d’un procés inmediat senon a un plaç de dus ans en eth que ei important véir quina serà era evolucion deth mercat immobiliari.
Eth projècte urbanistic de La Tuca en eth qu’ara sonque ei permés eth bastiment de 19 abitatges ei venculat ath Plan Especiau de Desvolopament dera estacion que tanben aurà d’èster aprovat pera Comission d’Urbanisme atau coma as condicions administratiues des proprietaris des montanhes que requèn enes Entitats Municipaus Descentralizades de Betren e Escunhau e Casarilh.
Er alcalde felicitèc era predisposicion dera Generalitat entà amiar entà dauant eth projècte de redubertura dera estacion, susot auent en compde es dus darrèri ans plens de deficultats entà amià’c tà dauant. “Ei un pas definitiu en eth qu’er Ajuntament de Vielha e Mijaran prén eth compromís de hèr possible esquiar en municipi” declarèc Perrdices. D’aute biais, era licència d’òbres serà tanben condicionada ar aval bancari de 50 milions d’èuros qu’aurà de presentar era empresa Tucaran Resort.